عورت اور مرد کا ذکر چھڑا ہے تو ہمیں ایک لطیفہ نما واقعہ یاد آگیا۔ امید ہے اس لطیفے سے مرد عورت دونوں کی اہمیت کا حق ادا ہو جائے گا۔

ہمارے دو دوستوں نے انجنیئرنگ کے بعد آرمی میں شمولیت اختیار کر لی اور ان کی پوسٹنگ کھاریاں کینٹ ہو گئی۔ اس وقت وہ دونوں کنوارے تھے۔ جس بیرک میں وہ رہتے تھے اس سے نیچے والی منزل ميں ایک خوبصورت جوڑا رہائش پذیر تھا۔ ابھی انہیں وہاں رہتے ہوئے چند دن ہی ہوئے تھے کہ خوش شکل میجر صاحب نے انہیں چائے پر بلا لیا۔

باتوں باتوں میں میجر صاحب نے دونوں کی شرافت کی تعریف کی۔ اس کے بعد مذاق کے انداز میں بولے تم لوگوں کو معلوم ہے کہ میری بیوی انتہائی خوبصورت گڑیا جیسی ہے۔ کہیں تمہاری نظر اس پر تو نہیں۔ ایک دوست نے میجر صاحب کی بات سن کر زور سے قہقہہ لگایا جس پر میجر صاحب تھوڑے سنجیدہ ہو کر بولے اس کا مطلب یہ ہوا کہ میرا شک درست تھا۔ دوست ہنسی کنٹرول کرتے ہوئے بولا “جناب جب آپ سے ہماری نظر ہٹے گی تو ہم آپ کی بیوی کو دیکھیں گے” یہ سن کر میجر صاحب ہنس ہنس کر لوٹ پوٹ ہو گئے۔