Submitted on 2009/08/02 at 7:18am

بعض اوقات انسان جب بھٹکتا ہے تو کچھ لمحوں میں ہی بھٹک جاتا ہے۔ اڈیالہ جیل میں اغواء برائے تاوان کے جرم میں پچیس سال سزا کاٹنے والے قیصر ندیم کی میٹرک کے امتحان میں پنجاب بھر میں دوسری پوزیشن لینے پہ اس بات پہ حیرانگی ہوتی ہے ۔ کہ ایسا گھناؤنا جرم کرنے والا تعلیم کی اہمیت کو کیسے سمجھ گیا۔

یا تو وہ پیشہ ور مجرم نہیں تھا ۔ اور جذبات اور حالات کے دباؤ میں آکر اتنا بڑا جرم کر گیا۔ یا پھر اسکے کیس میں عمومی رواج کے عین مطابق ہماری ہر دلعزیز پولیس نے اسے قربانی کا بکرا بنا ڈالا۔

اگر تو اسے قربانی کا بکرا بنایا گیا ہے تو اسکے کیس کو دوبارہ ری اوپن کیا جائے۔ یا پھر اس نے یہ جرم کیا ہے تو اسے قانون میں ایسے جرائم کرنے والوں کے ساتھ اچھے کردار یا نمایاں کارنامہ قرار دینے والوں کی زیادہ سے زیادہ رعایت دی جائے۔ تعلیم کے میدان میں اس کی مزید مدد کی جائے۔

مگر میڈیا کے دباؤ یا کسی اور وجہ سے اگر وہ واقعی اغواء برائے تاوان کا مجرم ہے تو اسے معاف نہیں کیا جائے۔

ہمیں آپ سے اختلاف ہے۔ اغواء برائے تاوان کوئی معمولی جرم نہیں۔ یہ قتل اور اقدام قتل جیسا انتہائی سخت فوجداری جرم ہے۔ پاکستان میں اغواء برائے تاوان جس میں اکثر و بیشتر اغواء کئے گئے افراد یا بچوں کو تاوان نہ ملنے پہ قتل کر دیا جاتا ہے۔ اور بعضوں کو تو تاوان لینے کے بعد بھی پہچانے جانے کے خوف سے مار دیا جاتا ہے ۔ جبکہ جس خاندان کا کوئی فرد اغواء ہوجاتا ہے وہ جیتے جی مر جاتے ہیں۔ انکا ایک ایک لمحہ سولی پہ گزرتا ہے۔ اگر مغوی کوئی بچہ ہو تو یہ عذاب اور بھی بڑھ جاتا ہے۔

تاوان کے لئیے رقم اکھٹی کرنے کے لئے لوگ کس طرح عمربھر کی کمائی کے اثاثے اونے پونے بیچتے ہیں۔ عزیزو اقارب سے قرضہ لیتے ہیں۔ یہ الگ سے ایک المیہ ہے۔

پاکستان کے جرائم پیشہ لوگوں نے یہ منفعت جرم کاروبار کے طور پہ اپنا لیا ہے ۔ کہ عالم یہ کہ اسطرح کے جرائم کرنے والے مفرور مجرم اب اینٹوں کے بھٹے پہ کام والے غریب مصلیوں تک کو اٹھا لیتے ہیں کہ اور کچھ نہیں تو ٹھیکیدار لاکھ دو لاکھ اپنے مزدوروں کو چھڑاوانے کے لئے تو دے گا ہی۔ کہ اسے اپنا سیزن چلانا ہوتا ہے۔

اغواء برائے تاوان کوئی چوری چکاری کی طرح معمولی جرم نہیں۔ جس میں دوسرے فریق کو محبوس نہیں کیا جاتا اور اس کی جان کو خطرہ نہیں ہوتا۔ اغواء برائے تاوان میں بات ہی مغوی کی سلامتی کے بدلے تاوان کی ہوتی ہے اور تاوان نہ ملنے کے بدلے مغوی کو قتل کردیا جاتا ہے۔ یہ قتل کی طرح کا سنگین جرم ہے

یہ ریاست کی ذمہ داری میں شامل ہے کہ وہ اپنے باشندوں کی حفاظت کی خاطر ایسے جرائم اور مجرموں کو کیفر کردار تک پہنچائے تاکہ لوگ عبرت حاصل کریں اور مظلوم کی دادارسی ہو۔ اسکے آنسو پونچھیں جاسکیں۔

اس لئے معاشرے میں اسطرح کے بڑھتے ہوئے جرائم پہ قانون میں دی گئی معافی کے علاوہ کوئی معافی نہیں دی جانی چاہئیے۔ البتہ اچھی پوزیشن پہ انعام و اکرام اور قانونی رعائیتیں دینے میں کوئی مضائقہ نہیں۔ جیل کی انتظامیہ کو بھی انعام و ترقی ملنی چاہئیے کہ انہوں نے اپنے قیدی کو ماحول و اسباب مہیاء کئے اور اسکی حوصلہ افزائی کی ۔ اگر تو یوں ہوا ہے تو۔