کل لاہور میں وزیراعظم کی آمد پر بہت بڑا ٹریفک جام دیکھنے کو ملا۔ لوگ گھنٹوں ٹریفک میں پھنسے رہے اور حکمرانوں کو بدعائیں دیتے رہے۔ حتی کہ میاں نواز شریف بھی trafficjamwahdatcolonyاس ٹریف جام سے نہ بچ سکے۔ ہو سکتا ہے کل کے تجربے سے وہ بھی سبق سیکھیں اور حکمرانوں کے پاس نہ صرف اپنا احتجاج ریکارڈ کرائیں بلکہ جب خود حکمران بنیں تو اس طرح کی زحمت سے عوام کو بچائیں۔ میاں صاحب ٹریفک جام کی مستقل زحمت سے چھٹکارے کیلیے اپنے ارکان اسمبلی کو ایوان میں قرارداد پیش کرنے کی ہدایت بھی کر سکتے ہیں تا کہ اس مسئلے کا کوئی مستقل حل تلاش کیا جا سکے۔ لیکن ہماری یہ خواہش شاید کبھی پوری نہ ہو سکے کیونکہ حکمران بنتے ہی سیاستدانوں کو یہ سب کچھ بھول جانے کی بیماری بہت پرانی ہے۔

اگر میاں صاحب یا کسی اور ہمدرد رکن اسمبلی کا ایسا پروگرام بنے تو وہ ہماری تجاویز پر بھی غور کر سکتے ہیں۔ ہم چاہیں گے کہ عمارتوں سمیت تمام منصوبوں کے افتتاح پر پابندی لگا دی جائے۔ یا اگر افتتاح کرنا ہی ہے تو پھر سابق ڈکٹیٹر پرویز مشرف کی طرح اصل مقام پر جانے کی بجائے تقریب گورنر ہاوس وغیرہ میں منعقد کریں اور حکمران خود ہیلی کاپٹر کے ذریعے پہنچیں۔

اس تجویز کے پیچھے بہت سارے فوائد ہیں یعنی حکمران ایک تو عوام کی بدعاوں سے بچیں گے اور دوسرے لوگوں کا قیمتی وقت بھی برباد نہیں کریں گے۔

ہمیں سمجھ نہیں آتی کہ تعمیراتی منصوبوں کے افتتاح سے حکمرانوں کو کیا حاصل ہوتا ہے۔ یہ اصل منصوبہ شروع کرنے والے کیساتھ زیادتی ہوتی ہے کہ منصوبہ وہ شروع کرتا ہے اور اس کی تکمیل پر تختی کسی اور کی لگ جاتی ہے۔ اگر افتتاح کا مقصد تختی ہی لگانا ہوتا ہے تو وہ بناں پہنچے وہاں لگائی جا سکتی ہے۔ اگر افتتاح کی تصاویر بنانا بھی مقصود ہے تو وہ بھی آجکل کے ترقی یافتہ دور میں سٹوڈیو میں ہی بن سکتی ہیں۔ تو پھر سخت گرمی میں عوام کو جھلسانے کی کیا ضرورت ہے۔

حکمرانوں کو چاہیے کہ وہ لوگوں کے صبر کو اتنا نہ آزمائیں کہ ایک دن وہ ان کے کارواں کو اپنے ٹریفک جام میں ہی گم کر دیں۔ ویسے آفرین ہے عوام پر کہ وہ اتنے بڑے عذاب کو خندہ پیشانی سے جھیل رہے ہیں۔

Related Posts